Reading
Add Comment
اهلن اهلن صديقاتي من البلوق ماتصدقون كيف اشتقت لكم ...
اليوم جبت لكم موضوع يجنن هو ترند خريف شتاء ٢٠١٧ بمعنى اصح جبت لكم الترندات اللي عجبوني وجبت لكم اكثر الترندات لفتت انتباهي ..يالله نبدأ
اول شي بنبدأ بمعنى كلمة trend معنى كلمة ترند "التوجه"
يعني اليوم بنتكلم عن توجهات فاشن خريف شتاء ٢٠١٧
والتوجهات او الترند مو شي ثابت مره يكون تصميم معين توب بالترند الموسم اللي بعده مايكون عليه اقبال وهكذا، فنصيحه مني لكم اذا كانت عندك جاكيتات او بناطيل بحاله جيده وممكن تلبسينها اكثر من مره لكن طفشتي منها ارفعيها باكياس حفظ الملابس وبعدها بفتره انا متاكده انه بترجع ترند او انك راح تحصلين لها تنسيق .
وبس بكذا وضحت معنى كلمة ترند ووصلت الفكره اللي ابيها يالله نبدأ نتكلم عن التوجهات بفاشن خريف شتاء ٢٠١٧:
اول ترند : فستان بنقشة ورد \ flower dress
هذا الترند مره عجبني لانه غريب على موسم الخريف والشتاء لانه اغلب الترندات لمواسم الخريف والشتاء تكون داكنه لكن هالموسم شفت كثير الوان مشمشيه وورديه وازرق ..
والترند هنا يركز على انك تحولين فستان الصيف لفستان مناسب للخريف والشتاء بإضافة قطع واكسسوارات تعطي ايحاء انه هذا اللوك للخريف او الشتاء
كيف تسووين هالترند ؟
اولا تحتاجين الفستان وزي ماقلت الترند الفساتين بنقشة ورد حاولي تدورين نقشة ورد ملفته
ثانيا اضيفي جاكيت جلد او جاكيت فرو او ترنش كوت او بلايزر بحجم كبير .. انتي وذوقك
ثالثا البسي معه تايت اذا كان قصير او شراب ميتلك لانه مره دارج هالموسم
رابعا نسقي معه بوت الكاحل او البوت الطويل ، وهاذي الخطوه هي اللي بتعطي اللوك ايحاء بموسم الخريف او الشتاء
اهم شي انه كل الاضافات اللي تضيفينها على الفستان مهم انها تكون متناسقه مع بعضها
ثاني ترند : كوت بحجم كبير \ over size coat :
هذا الترند مااتوقع انه جديد او توه بدأ يدرج ، من زمان وهو موجود بالترند ولااتوقع انه بيروح بعيد
لكن صار دارج هالفتره اكثر من اي موسم واللي صاير انه كل مايكون بحجم اكبر كل مايكون ستايلش اكثر
صايرين ينسقون معه بناطيل جلد او جينز و تنانير جلد او جيتز او تنانير لف
واللي حبيته انه اذا كان الكوت كبير يلبسون معه تايت اسود وبوت الكاحل او البوت اللي يكون فوق الركبه
ويصير زي الفستان .
الترند الثالث : بوت الكاحل \ ankel boot :
البوت هذا ع ج ي ب شفته مره كثير بفاشن شو وبمحلات مثل زارا شفته بكعب عريض وبكعب نحيف واللي مره درج من هاذي الابوات بوت الجورب يصير كانه جورب ماسك على الرجل وهذا النوع يعطي الرجل شكل جميل
واكثر التنسيقات اللي لفتتني بهذا الترند هو اذا نسقوه مع فستان ميدي طبقات مره حلو ، وكمان حلو مع اللوك السبورتي شيك واللحين راح نتكلم عن هذا اللوك لانه اكيد ترند ومن احب الترند على قلبي .
الترند الرابع : بلوفر صوف مع تنوره ميدي \ knit and mid :
هالترند انا متأكده انه عند اي بنت وهذا اللوك من اكثر اللوكات الناعمه واللي تتفجر فيها الانوثه ، وانا عن نفسي احس الترند هذا مره يذكرن بالكوريين لانه من قبل مايكون ترند وهم كانو يلبسونها شفته كثير بالدرامات الكوريه
والترند اكثر شي يركز عليه انه يكون البلوفر الصوف منفوش وفلافي وطويل شوي والتنوره تكون مكسره وطولها ميدي
الترند الخامس : المتاليك \ metallic :
المتاليك ماينفع اقول انه ترند لانه دايم وراح يطول على خط الترندات سواء للصيف او للشتاء اتوقع الاغلب شافوه على كثير بالانستقرام والبلوق ، بس وشو اللي مختلف بهذا الترند عن الموسم اللي قبل انه المواسم اللي قبل كان الترند مثلا تنوره ميتالك او بلوفر او شنطه .. لكن هالموسم من راسك لرجلك متاليك واكثر ناس ابدعو بهذا الترند هم شانيل ، اذا حابه تاخذين الهام منهم بحط لك رابط الفاشن شو هنا ..
الترند السادس : رياضي وانيق \ sporty chic :
هذا الترند بالنسبه لي مميز ليه ؟ لانه جامع مابين الاناقه والراحه ومااتوقع فيه احسن من كذا ..
واتوقع انه الاغلب شافو هالترند كثييير بهالفتره على بلوقرز وانستقرامر وفاشن شوز ..
طيب كيف تسوين هاللوك ؟ تجمعين مثلا بين كعب وبنطلون رياضي مع جاكيت جلد .
وبس بكذا خلصنا موضوع هالتدوينه عن موضوع توجهات الفاشن لخريف شتاء ٢٠١٧
اتمنى لعجبكم واهم من كل شي استفدتو منه .
ونسيت اقولكم اني سويت لوك عن الترندات اللي تكلمت عنهم بهاذي التدوينه شوفوه بحطه لكم :
اتمنى يعجبكم .. ومع السلامه اشوفكم ان شاء الله بتدوينات جديده .
0 التعليقات:
إرسال تعليق